27. Nóvember 2023
Fá jólastemninguna beint í æð
Það var mikil stemning sem myndaðist á matarmarkaði Hagkaups sem hófst í gær og er haldinn dagana 24.-26. nóvember. Fjöldi íslenskra smáframleiðenda kynnti vörur sínar fyrir gestum og gangandi, auk þess sem Hagkaup kynnti einstakar vörur hjá sér. Sælkerabúðin, Lemon og 17 Sortir tóku einnig þátt í matarveislunni og voru með ljúffengt smakk í boði.
„Þetta er annað árið í röð sem við höldum jólamarkað hjá okkur í Hagkaup og klárlega viðburður sem mun koma til með að stækka næstu árin. Það má segja að hann markar upphaf aðventunnar og við fáum að taka forskot á jólakræsingum. Úrvalið af spennandi vörum er mikið og gaman að hitta fólkið á bak við vörurnar, það gerir þetta enn betra. Markaðurinn verður þessa helgina og er staðsettur í Hagkaup Smáralind. Við hvetjum fólk að sjálfsögðu til þess að kíkja við og fá jólastemninguna beint í æð“ segir Eva Laufey Kjaran markaðs- og upplifunarstjóri Hagkaups.