5. Febrúar 2024

Lasagne súpa Helgu Möggu

Lasagne súpa er svo skemmtileg tilbreyting við venjulegt lasagne. Þessi súpa er alveg tilvalin í kvöldmatinn í vetrar kuldanum sem er á Íslandi þessa dagana. Uppskriftin kemur frá Helgu Möggu.

Innihald:

1 msk olía
150 g laukur (einn laukur)
2-3 hvítlauksrif
500 g nautahakk
400 g niðursoðnir tómatar (1 dós)
660 g pasta sósa (1 dós)
170 g tómat púrra
150 g kotasæla
35 g parmesan ostur
900 g kjötsoð, ein ferna
250 g lasagne plötur frá Filotea
Salt, pipar, timían um 1 tsk af hverju kryddi.
Fersk basilíka

Byrjaðu á því að skera lauk og hvítlauk smátt og steikja upp úr olíunni. Bættu hakkinu út í pottinn og kryddaðu með salti, pipar og timían. Bættu því næst sósunum út í pottinn, maukaðri kotasælunni og svo kjötsoðinu. Svo rífur þú parmesan ostinn yfir og blandar við súpuna. Gott að setja smá ferska basilíku yfir. Að lokum eru lasagne plöturnar brotnar niður í bita og bætt út í pottinn. Þetta látið malla á miðlungs hita í um 20 - 30 mínútur eða þangað til pastaplöturnar eru tilbúnar. Ef þér finnst súpan vera of þykk er gott að bæta smá vatni út í hana.

Gott að bera súpuna fram með maukaðri kotasælu til hliðar og parmesan osti.