24. Júní 2024

Næringarríkir bananabitar

Ef þú ert að leita að leið til að nýta þroskaða banana þá er þetta akkúrat uppskriftin sem Helga Magga mælir með. Þessir bitar eru svo sniðugir og góð næring fyrir krakkana í nesti á námskeiðin í sumar, á fótboltamótin og því gott að hafa bitana sem orkuríkasta. Bananabitarnir eru líka frábært millimál fyrir alla. 

Innihald: 
2 þroskaðir bananar 230 g 
200 g haframjöl
30 g hnetusmjör
30 g akasíuhunang
1 tsk matarsódi og smá salt 
200 g grísk jógúrt 
100 ml léttmjólk 
Súkkulaðidropar eftir smekk (ég setti 20 g ofan á). 

Bananarnir eru stappaðir og svo er öllum innihaldsefnunum blandað saman í skál. Súkkulaðidroparnir eru settir ofan á í lokin en það má einnig blanda þeim við deigið. Ef þú vilt lækka fitumagnið í uppskriftinni og hækka próteininnihaldið er hægt að setja hreint skyr í stað jógúrtarinnar og jafnvel blanda próteindufti út í deigið. Bakað við 180 gráður í 40 mínútur.