1. Apríl 2025

Fríar hjónavígslur í Hagkaup í dag

Frá og með deginum í dag geta pör 18 ára og eldri gengið í hjónaband í Hagkaup Skeifunni, allan sólarhringinn, undir handleiðslu viðurkennds athafnastjóra. Er þetta í fyrsta sinn sem íslenskt fyrirtæki býður upp á þjónustu sem þessa.

„Í kjölfar afar vel heppnaðs samstarfs um afhendingu vegabréfa og nafnskírteina, þá fórum við að hugsa hvað við gætum gert fleira til að einfalda viðskiptavinum okkar lífið. Það lá beint við að bæta þessari þjónustu við hjá okkur“, segir Sigurður Reynaldsson, framkvæmdastjóri Hagkaups. „Að bæta við hjónavígslum var eiginlega næsta rökrétta skrefið í þjónustuframboði verslunarinnar“, bætir Sigurður við.

Í kynningarskyni verða hjónavígslurnar í Hagkaup ástföngnum pörum að kostnaðarlausu í dag en frá og með morgundeginum kemur fólk til með að þurfa að greiða vægt gjald samkvæmt verðskrá fyrir þjónustuna.

Sigurður segir að pör geti því mætt á þjónustuborðið í Hagkaup Skeifunni til miðnættis í dag og látið pússa sig saman sér að kostnaðarlausu. Hann segir að eftir daginn í dag sé fólk velkomið hvenær sem er sólarhringsins til að koma og festa ráð sitt gegn vægu gjaldi.

Í Hagkaup Skeifunni hefur verið sett upp falleg aðstaða þar sem hjónavígslurnar fara fram. „Við leggjum upp úr því að hafa umhverfið notalegt og hlýlegt þannig að pörin geti ekki aðeins sagt já við réttu aðstæðurnar, heldur líka náð myndum sem fanga augnablikið í sínu besta ljósi“, segir Sigurður.

Þau sem hyggja á giftingu eru vinsamlegast beðin um að mæta með gild skilríki eða panta slík og sækja á þjónustuborðið í Hagkaup Skeifunni áður en gengið er í það heilaga. Þá þarf einnig tvo vígsluvotta eða svaramenn í athöfnina.