21. Október 2024
Vegabréf og nafnskírteini afhent í Hagkaup Skeifunni
Frá með deginum í dag verður hægt að sækja vegabréf og nafnskírteini í verslun Hagkaups í Skeifunni, allan sólarhringinn, alla daga vikunnar.
Það er mikil þjónustubæting fyrir viðskiptavini Þjóðskrár að geta nálgast skilríki miðsvæðis á höfuðborgarsvæðinu. Við verslun Hagkaupa Skeifunni eru næg bílastæði sem ekki þarf að greiða fyrir, mun betra aðengi er fyrir viðskiptavini, sérstaklega fyrir fatlaða og opið allan sólarhringinn. Starfsfólk Hagkaups hefur fengið viðeigandi þjálfun og sömu öryggistöðlum verður fylgt eftir sem áður. Umsækjandi sem óskar eftir því að sækja skilríkin í Hagkaup hefur til þess 7 daga frá því að skilríkið er tilbúið. Eftir þann tíma þarf viðkomandi að sækja skilríkið til Þjóðskrár, Borgartúni 21.
„Við höfum lengi leitað lausna við að bjóða okkar viðskiptavinum upp á betri þjónustu við afhendingu skilríkja,“ segir Júlía Þorvaldsdóttir, framkvæmdastjóri hjá Þjóðskrá. Hún segir þau hafa velt fyrir sér hvað þau gætu gert til að bæta þessa þjónustu, vera meira miðsvæðis, bjóða upp á fleiri bílastaði án gjaldtöku og rýmri opnunartíma. ,,Þá kom nafn Hagkaups upp í hugann og við ákváðum að leita til þeirra með þessa hugmynd sem samræmist leiðarljósi Þjóðskrár. Stjórnendur Hagkaups tóku strax vel í hugmyndina og hafa unnið hratt og vel í að láta þennan draum rætast. Við erum því glöð að geta veitt viðskiptavinum okkar betri þjónustu,” segir Júlía.
„Við vorum himinlifandi að fá þessa fyrirspurn frá Þjóðskrá því við sem þjónustufyrirtæki erum stöðugt að leita nýrra leiða til að mæta betur þörfum viðskiptavina okkar. Við erum því stolt af því að vera valin í þetta samstarf af ríkisstofnun sem þorir að hugsa út fyrir boxið, eins og sagt er. Það verður án efa mikil breyting fyrir viðskiptavini Þjóðskrár að geta komið þegar þeim hentar til að sækja skilríki sín og við hlökkum til að taka á móti þeim öllum” segir Sigurður Reynaldsson framkvæmdastjóri Hagkaups.
